സുനിത വില്യംസിനെ തിരിച്ചു കൊണ്ടുവരാന്‍ സഹായിക്കുന്നവര്‍ക്ക് നാസ സമ്മാനം പ്രഖ്യാപിച്ചു

ന്യൂയോര്‍ക്ക്: ബഹിരാകാശത്തു നിന്ന് സുനിത വില്യംസിനെയും ബാരി ബുച്ച് വില്‍മോറിനെയും തിരിച്ചു കൊണ്ടു വരുന്നതിനായി പ്രതിഫലം പ്രഖ്യാപിച്ച് നാസ. ബഹിരാകാശ യാത്രികരെ തിരിച്ചെത്തിക്കാനുള്ള മാര്‍ഗം കണ്ടെത്തി നല്‍കുന്നവര്‍ക്കായി 20,000 ഡോളര്‍ ( 16,93419 ലക്ഷം രൂപ) ആണ് നാസ പ്രതിഫലം പ്രഖ്യാപിച്ചിരിക്കുന്നത്. 2024 ജൂണ്‍ അഞ്ചിനാണ് ആദ്യ ബോയിംഗ് സ്ററാര്‍ ലൈനര്‍ വിമാനത്തില്‍ സുനിതയും ബാരി ബുച്ച് വില്‍മോറും പത്തു ദിവസത്തെ ബഹിരാകാശ ദൗത്യത്തിനായി പറന്നുയര്‍ന്നത്. എന്നാല്‍ തുടര്‍ച്ചയായ ഹീലിയം ചോര്‍ച്ചയെ തുടര്‍ന്ന് ഭൂമിയിലേക്ക് തിരികെ പോരാന്‍ സാധിച്ചിട്ടില്ല.

ബോയിങ് സ്ററാര്‍ലൈനര്‍ ബഹിരാകാശ പേടകത്തിന്‍റെ മനുഷ്യരെ വഹിക്കുന്ന ആദ്യ ദൗത്യത്തിന്‍റെ പൈലറ്റാണ് സുനിത. ബോയിങ്ങിന്‍റെ ക്രൂ ഫ്ലൈറ്റ് ടെസ്ററ് ആണിത്. സാങ്കേതികത്തകരാറുകള്‍ മൂലം പലതവണ മാറ്റിവച്ചശേഷമായിരുന്നു ജൂണില്‍ സ്ററാര്‍ലൈനര്‍ വിക്ഷേപിച്ചത്. മൂന്നാം ശ്രമത്തിലാണ് പേടകത്തിന് ലിഫ്റ്റ് ഓഫ് ലഭിച്ചത്. ഇപ്പോള്‍ സുനിത ഭാരമില്ലാത്ത ആ ബഹിരാകാശാന്തരീക്ഷത്തില്‍ ഫലപ്രദമായി സസ്യങ്ങള്‍ നനയ്ക്കുന്നതിനുള്ള വഴികള്‍ പര്യവേഷണം ചെയ്യുകയാണെന്നാണ് നാസ പുറത്തു വിടുന്ന റിപ്പോര്‍ട്ട്.

വേണ്ടത്ര മുന്നൊരുക്കങ്ങളില്ലാതെയാണ് മുതിര്‍ന്ന ബഹിരാകാശ സഞ്ചാരികളായ സുനിതയെയും ബുച്ച് വില്‍മോറിനെയും നാസ ബഹിരാകാശത്തേയ്ക്ക് അയച്ചതെന്ന വിമര്‍ശനം ലോകത്തിന്‍റെ വിവിധ ഭാഗങ്ങളില്‍ നിന്നും ഉയരുന്നുണ്ട്.2 006ലും 2012ലുമായി രണ്ടു തവണ ബഹിരാകാശയാത്ര നടത്തിയിരുന്നു സുനിത. 322 ദിവസം ഇതുവരെ ബഹിരാകാശത്ത് ചെലവഴിച്ചു. ഏഴ് തവണയായി 50 മണിക്കൂറിലേറെ ബഹിരാകാശ നടത്തത്തിലും പങ്കെടുത്തിരുന്നു.