റോമിലെ പുതിയ ഇന്ത്യന്‍ എംബസി ചാന്‍സറി കേന്ദ്ര വിദേശകാര്യമന്ത്രി എസ് ജയ്ശങ്കര്‍ ഉദ്ഘാടനം ചെയ്തു

റോം: റോമിലെ ഇന്ത്യന്‍ എംബസിയുടെ പുതിയ ചാന്‍സറി നവംബര്‍ 24~ന് വിദേശകാര്യ മന്ത്രി എസ്. ജയശങ്കര്‍ ഉദ്ഘാടനം ചെയ്തു, ഇന്ത്യയും ഇറ്റലിയും തമ്മിലുള്ള ആഴത്തിലുള്ള ചരിത്രപരമായ ബന്ധത്തെയും വളര്‍ന്നുവരുന്ന പങ്കാളിത്തത്തെയും കുറിച്ച് മന്ത്രി ഊന്നിപ്പറഞ്ഞു. ഇരു രാജ്യങ്ങളും പങ്കിടുന്ന അതുല്യമായ സമുദ്ര വീക്ഷണത്തെ ഉയര്‍ത്തിക്കാട്ടിക്കൊണ്ട്, യൂറോപ്പുമായുള്ള ഇന്ത്യയുടെ ചരിത്രപരമായ ഇടപെടലുകളുടെ സുപ്രധാന ഭാഗമാണ് ഇറ്റലിയെ ജയശങ്കര്‍ വിശേഷിപ്പിച്ചത്. അതേസമയം ഇറ്റലിയിലെ ഇന്ത്യന്‍ പ്രവാസികള്‍ക്കുള്ള സേവനങ്ങള്‍ വര്‍ധിപ്പിക്കുന്നതില്‍ പുതിയ ചാന്‍സറിയുടെ പ്രാധാന്യം മന്ത്രി അടിവരയിട്ടു പറഞ്ഞു.

സമീപ വര്‍ഷങ്ങളില്‍ ഇന്ത്യ~ഇറ്റലി പങ്കാളിത്തത്തിന്റെ തുടര്‍ച്ചയായ വിപുലീകരണത്തിന് ഇത് അനുയോജ്യമാണ്. ഇറ്റലിയിലെ ഇന്ത്യന്‍ സമൂഹത്തെ മികച്ച രീതിയില്‍ സേവിക്കാനും ഇത് സഹായിക്കുമെന്നും ജയ്ശങ്കര്‍ സോഷ്യല്‍ മീഡിയ പ്ളാറ്റ്ഫോം എക്സില്‍ കുറിച്ചു. പ്രധാനമന്ത്രി മെലോണിയുടെ ഗവണ്‍മെന്റിന്റെ ഇന്തോ~മെഡിറ്ററേനിയന്‍ ശ്രദ്ധയെ ജയശങ്കര്‍ പ്രശംസിച്ചു.

നവംബര്‍ 24 മുതല്‍ 26 വരെ ഇറ്റലിയില്‍ ഔദ്യോഗിക സന്ദര്‍ശനത്തിനെത്തിയ മന്ത്രി ജയ്ശങ്കറിനെ ഇറ്റലിയിലെ ഇന്ത്യന്‍ അംബാസഡര്‍ വാണി റാവുവും ഇറ്റാലിയന്‍ വിദേശകാര്യ മന്ത്രാലയത്തിലെ മുതിര്‍ന്ന ഉദ്യോഗസ്ഥരും ചേര്‍ന്ന് റോമില്‍ സ്വീകരിച്ചു.

സന്ദര്‍ശന വേളയില്‍, ജി 7 വിദേശകാര്യ മന്ത്രിമാരുടെ മീറ്റിംഗിന്റെ ഔട്ട്റീച്ച് സെഷനില്‍ ഇന്ത്യയെ പ്രതിനിധീകരിക്കാന്‍ മന്ത്രി ഫിഗ്ഗിയിലേക്ക് പോയി. ഇന്‍സ്ററിറ്റ്യൂട്ട് ഫോര്‍ ഇന്റര്‍നാഷണല്‍ പൊളിറ്റിക്കല്‍ സ്ററഡീസും (ഐഎസ്പിഐ) ഇറ്റലിയുടെ വിദേശകാര്യ~അന്താരാഷ്ട്ര സഹകരണ മന്ത്രാലയവും ആതിഥേയത്വം വഹിക്കുന്ന പത്താമത്തെ എംഇഡി മെഡിറ്ററേനിയന്‍ ഡയലോഗിലും അദ്ദേഹം പങ്കെടുക്കും.